قصص رعب مثيرة

انا مؤلف قصص من زمان من حوالي سنه دي هوايتي الصراحه , انا كنت مألف قصة رعب , وعايز رأيكم بصراحهه حتى لو وحشه مش مشكلة

ده الجزء الأول

( البدايه )
يقال أن في احد الأيام كان في عماره فــ اسكندريه , تسمى عمارة ( شياطين مجدي ) نظراً لإن كان في العماره ساكن إسمه مجدي , وبيقولو أنه اتقتل فــ شقتو من 30 سنه , من بعد متقتل والناس بدأت تسمع أصوات غريبه جداً صادره من شقتو , ومن شدة الأصوات ورعبها الناس كلها اللي كانو ساكنين فــ العماره عزلو , إلا ساكن واحد بس كان اسمه عم عبدالله , عم عبد الله راجل كبير جداً وعلى قده , ولو عزل مش هيلاقي حته يقعد فيها , فاتعود على كده .

كان في 3 شباب , الــ 3 شباب دول كانو اصحاب , ومن كتر حبهم وتعلقهم ببعض وصلو لدرجة الاخوات , كانو كل حاجه يعملوها مع بعض , اتعرفو على بعض فــ جامعتهم , الــ3 شباب كان اسميهم كالتالي :

احمد محمد 22 سنه وده كان اكبر واحد فيهم .
علي عبد الله 21 سنه
محمد سمير 20 سنه

الــ 3 شباب دول قرروا ان هما يروحو يصيفو زي أي شباب , بسبب المذاكره طول السنه والتعب , فقرروا ان هما يروحو يصيفو فــ اسكندريه , عشان حالتهم الماديه اللي كانت سيئه جدا , المهم وصلو الــ 3 شباب الاسكندريه وبدأو رحلة البحث على شقه يقعدو فيها تكون على قد فلوسهم , فضلو يدورو لغاية ملقو إعلان عن إيجار بيت شعبي فــ منطقة اليكس , راحو الشباب للسمسار بتاع الشقه ووصفلهم الطريق واداهم المفتاح , ومرضاش يقولهم على تفاصيل الشقه ! مرضاش يقولهم ان الشقه دي كان مقتول فيها عم مجدي من 30 سنه , وان الشقه بتصدر منها اصوات ضحك شياطين وعذاب ! المهم دخلو الشباب الشارع بتاع الشقه , وهما داخلين بدأو الناس يبصلهم بصه غريبه ! وكأنهم مستغربين ان هما جايين يسكنو فــ شقة مجدي ! الشباب خافو , عبد الله قال : ايه ده هما بيبصلنا كده ليه !
رد عليه احمد : انا مش عارف بس متخفش ممكن يكونو بيبوصلنا عشان لسه جايين جداد .

بعد موصلو للعماره اللي هيقعدو فيها وجدوا شيئ غريب , العماره ! ايوه العماره كان شكلها مخيف جداً وكانت مظلمه ظلام اسود من الداخل , وكأن العماره مفيهاش أي حد , كأنها عماره مهجوره , قال محمد وبكل خوف : هي دي العماره اللي هنسكن فيها ؟
رد عليه احمد وبكل خوف : اها هي دي العماره , متخافش ممكن تكون كده عشان مفيهاش سكان بقالها مده !
أحمد مكنش راضي يطلع خوفه عشان متبوظش الرحله , وعشان ده كان السبيل الوحيد عشان يرفهو عن نفسهم بيه , دخلوا لعماره وسط خوف شديد وهما داخلين قابلهم عم عبدالله وقالهم : انتو رايحين فين ياولاد .
قالولو : احنا طالعين فوق ياحج عشان نقعد فــ الشقه اللي فوقك .
عم عبد الله اول مسمع الكلام ده راح داخل جري بيته وقافل على نفسه الباب ! وسط حالة رعب من الــ 3 .
علي : متيجي نروح بقى يااحمد انا بدأت اقلق .
احمد : يابني متخفش الراجل عجوز باين عليه ومش بيفهم حاجه .
محمد : لا يااحمد , الشقه دي باين عليها فيها حاجه غريبه , باين عليها مسكونه !

احمد وبكل ارتباك : مسكونه ! لا يابني انت خيالك راح لفين اكيد انت متخيل كده عشان عمالين نلف طول اليوم وندور , اهدى يابني .

بدأو يطلعو ع السلم , وهما طالعين ع السلم حسو بهزه غريبه جداً ع السلم , طلعو جري وسط حالة رعب شديده , لغاية موصلو للشقه اللي هما هيسكنو فيها , اول موصلو للباب سمعو اصوات غريبه جداً , كأنها اصوات ناس بتضحك ! محمد وعلي قالو يلا نمشي , أحمد قالهم لا مش هنمشي , قاموا قايلين لا انت باين عليك فيك حاجه انت مستني لما نموت ! وهما بدأو يمشوا قام احمد فاتح الباب بسرعه , اول مفتح الباب اختفت الأصوات , وكان مفيش أي صوت صدر ! , قالهم وبصوت عالي : ايه الجبن اللي فيكو ده ! مش قولتلكم ان كل اللي بيحصل ده تهيأت ! في ايه .

دخلو الشقه وجدوها شقه عاديه جدا كل حاجه فيها طبيعيه , حاطو كل حاجتهم بعد مفحصو الشقه ونزلو عشان يصيفو , بعد منزلو ووصلو للبحر اكتشفو ان هما نسيو فلوسهم فــ البيت , ونسيو موبايلاتهم ! احمد قال لعلي ومحمد : استنوني هنا هروح اجيب الحاجه واجي , احمد راح وطلع ع السلم عادي محصلش أي حاجه لغاية موصل للشقه , ومن هنا يبدأ الموت ..